Kompozıtor, Qazaqstannyń halyq ártisi Áset Beıseýovtyń týǵanyna 80 jyl tolýyna oraı jaryq kórip otyrǵan kitapta zamandastarynyń, aǵa-inilerileriniń estelikteri, Qazaq radıosynyń «Altyn qorynda» saqtalǵan ánderiniń tizimi toptastyrylypty.
«Júregi án dep soǵatyn» kitaby lırıkalyq ánderimen ár adamnyń júregine sazdy áýenniń tunyq bulaǵy bolyp quıylǵan Áset Beıseýovtyń sonaý balalyq shaǵynan bastap, shyǵarmashylyqtyń shynar shyńyndaǵy jetistikteri týraly baıandalady.
Is-sharaǵa jazýshy Ǵabbas Qabyshuly, ónertanýshy Pernebek Momynov, Jambyl aýdany ákiminiń orynbasary Ádilbek Dalabaev, ardager ustaz Tólegetaı Aqbaýov, ánshi Nurǵalı Núsipjan, qaıratker jýrnalıst Jumash Arǵymbaev, kompozıtor Vladımır Pıtersev jáne t.b. belgili mádenıet jáne óner qaıratkerleri, aqynnyń týystary, oqyrmandar men BAQ ókilderi qatysty.
Is-sharany Qazaqstannyń eńbek sińirgen mádenıet qaıratkeri, kósemsóz sheberi, jazýshy, «Almaty aqshamy» gazetiniń bas redaktory Qalı Sársenbaı júrgizip, Áset shyǵarmashylyǵyna qatysty qyzyqty da, mazmundy estelikter aıtylyp, Áset ánderi oryndaldy.
«Qurdastar» povesi, «Syrly kúmbez», t.b. kitaptary arqyly oqyrmandar yqylasyna bólenip júrgen Tursynbek aǵamyzdyń jınaqtap, qurastyrǵan tushymdy eńbegine qatysýshylar rızashylyǵyn bildirip, Ásetteı tulǵanyń áni urpaqtan-urpaqqa jalǵasyn tabady degen úlken senimmen tarqasty.
Elvıra Serikqyzy,
«Egemen Qazaqstan»
ALMATY
